“Yashil makon” umummilliy loyihasi doimiy harakatga aylandi. Ona tabiatning, qolaversa, ekologiyamizning sofligini saqlashni niyat qilgan borki, ezgu niyat bilan yerga nihol qadadi. Bu ishga rahbar-u xodimlar, xalqimizning har bir vakili o‘z hissasini qo‘shishga bel bog‘ladi. Mana shunday harakatdan ruhlangan yoshlar ham bir chetda qarab turishmagani esa tahsinga sazovor.
Termiz tumanidagi 23-sonli maktab o‘quvchi-yoshlari ustozlarining ko‘magi va tavsiyasi ila maktabdagi bo‘sh turgan yer maydonlariga manzarali va mevali daraxt ko‘chatlarini ekishdi. Albatta, ekkanda ham hududning iqlim sharoiti, tuproq unumdorli, suvga chidamli jihatlarini ham inobatga olishdi. Ushbu ko‘chatlarning sanog‘i bilan qiziqsangiz, ularning soni oz emas, ko‘p emas — 15 mingdan ortgani esa tuman hokimi Shuhrat Nazarovning-da e’tiborini tortdi.
Hokim o‘quvchilarning hamda maktab jamoasining bunday harakatini e’tirof etdi va mehnatni munosib rag‘batlantirish maqsadida maktabga qimmatbaho sovg‘alar ulashdi. Tuman hokimining tashrifi esa maktabda katta tadbirga ulanib ketdi. Bu esa o‘quvchilarni yanada ruhlantirib, yaratuvchanlikka, mehnatsevarlikka, o‘qib o‘rganishga undashi aniq.
H.Baxtiyorova
