Bir ish bilan mashg‘ul bo‘lsak ham, bekorchilikdan ham vaqt o‘tadi. Faqatgina vaqtdan unumli foydalanib, naf keltiradigan yumush bilan mashg‘ul insongina behuda yashamagan bo‘ladi. Shu maqsadda angorlik Sevara Doniyorova har bir daqiqasidan to‘g‘ri foydalanishning uddasidan chiqib, atrofdagilarga ibrat bo‘lib kelmoqda.
U yurtimizda yaratilayotgan imkoniyatlar orqali ro‘zg‘orini butlayotgan, oilasiga ko‘makdosh bo‘layotgan ishbilarmon yoshlardan. Sevara bekor o‘tirish o‘rniga hunarmandchilik bilan shug‘ullanishni lozim topdi. Onasi va opa-singillari bilan maslahatlashib, birgalikda ayollar uchun to‘n tikishni yo‘lga qo‘ydi. Sevaraning onasi mohir chevar emasmi, qizlariga ham o‘z kasbini o‘rgatib, adashmagan ekan. Ular tikayotgan to‘nlar sifatli tikilgani uchun ham xaridorgir.
To‘n tikish orqasidan daromad ko‘rayotgan Sevara o‘z ishidan mamnun. Ayniqsa, bu ishga qiziqqan qizlar ham shogirdlikka tushish istagini bildirishganida Sevara quvondi. Sidqidildan kasbining sir-asrorini o‘rgatib, 20 nafardan ortiq shogird tayyorladi.
Hilol
