Urush — bu so‘zning o‘ziyoq ko‘ngilga g‘ulg‘ula, dahshat soladi. Shoira aytganidek, bu so‘zning nomi dunyodan o‘chishini pichirlay boshlaymiz. Yon qo‘shnimiz Afg‘onistonda yillar davomida notinchlik bo‘lgani, katta avlod vakillari bo‘lmish vatandoshlarimiz ana shunday harbiy harakatlarga qo‘shilib, qon kechgani, jon olib, jon berganini yaxshi bilamiz. Ana shunday afg‘on urushi qatnashchilarining o‘sha davrda boshidan kechirgan voqealarni ko‘p bora eshitganmiz ham.
Afgʻonistonda ekstremizmga qarshi harbiy harakatlari tugatilganiga ham 34 yil bo‘libdi. Angor tuman hokimligi tomonidan shu munosabat bilan “Ofarin” bazmgohida tadbir tashkil etildi. Tadbirga harbiy harakatlarda ishtirok etgan bir guruh vohadoshlarimiz taklif etildi. Samimiy va ajoyib tarzda boshlangan bayramda jam bo‘lgan quroldosh doʻstlar bir piyola choy ustida bir-birlari bilan diydorlashishdi, dildan suhbat qurishdi.
Uchrashuv bahonasida soʻzga chiqqanlar urushning dahshati, azobi haqida to‘xtalish bilan birga, bugungi dorilomon, tinch-osuda kunlarning qadriga yetmoqlik lozimligini ta’kidladilar. Ezgu tilaklar kuy-qo‘shiqlarga, sho‘x-shodon ohanglarga ulandi.
Hilol
