O‘zbek kinosida avvaliga Jaloliddin Manguberdi, endi esa Bobur davri boshlanayotgandek. Shoh va shoir Zahiriddin Muhammad Bobur hayoti, shaxsiyati ajoyib kino bo‘lgulik va tarixga muhrlangulik qimmatga ega. Faqat ana shunday durdona asarni yarata olish lozim. To‘g‘ri, buyuk ajdodimiz haqida avval ham serial suratga olingan. Bu yo‘ldagi yana bir qadam — Kinematografiya agentligi hamda O‘zbekiston Respublikasi Jamoat xavfsizligi universiteti hamkorligida suratga olingan Zahiriddin Muhammad Bobur hujjatli filmidir.
Filmning ssenariy muallifi va postanovkachi rejissyor Bobur Sher o‘g‘li, postanovkachi operator Diyor Ismatov, postanovkachi rassom Sanʼat Kenjayev, prodyuser Xurshid Alixo‘jayev. Ayni paytda kinorejissyor Bobur Sher o‘g‘li Zahiriddin Muhammad Bobur hazratlarining hayotiga bag‘ishlangan 30 qismdan iborat kinoserial ustida ishlayapti.
Umid qilamizki, ushbu serial Bobur bobomizning ichki dunyosini, dard-u qayg‘ularini ekran yuziga chiqarib, tomoshabinlar ko‘nglidan munosib joy olishga muvaffaq bo‘ladi.
H.Baxtiyorova
