Farzandimiz maktabga bordimi, ta’lim-tarbiyasi bilan bir qatorda nima yeb-ichayotganiga ham qiziqamiz. Axir, iste’mol uchun xarid qilayotgan yeguliklari sifatli, sanitariya talablari asosida tayyorlangan bo‘lishi kerak. Maktab oshxonasiga kiryaptimi yoki maktab tashqarisidagi do‘konlarga boryaptimi, bu borada nazorat qilishga urinamiz. Ota-onalarning bu borada o‘ylashlariga hojat qolmadi. Sababi barcha maktablarda boshlang‘ich sinf o‘quvchilarini bepul ovqat bilan taʼminlash yo‘lga qo‘yiladi.
Prezident farmoni loyihasiga muvofiq, bepul ovqat masalasidan boshqa jihatlarga ham e’tibor qaratilgan. Ya’ni taʼlim sifatini oshirish maqsadida 2023-yil 1-sentyabrdan har bir tuman (shahar)dagi bittadan maktabda o‘quvchilarni 2 ta xorijiy til va bitta kasb-hunarga o‘rgatish amaliyoti yo‘lga qo‘yiladi. Bu jarayon esa allaqachon boshlab yuborilgan.
2023/2024-o‘quv yilidan bosqichma-bosqich yangi o‘quv dasturlari amaliyotga kiritilishi ham sohadagi muhim qadam deyish mumkin.
Maktabgacha ta’lim sohasida esa 2023-yil 1-apreldan maktabgacha taʼlim qamrovini kengaytirish maqsadida yangi davlat bog‘chalarini ko‘p kvartirali uylarning noturar qavatlarida yoki boshqa uylarni sotib olib tashkil etishga ruxsat etiladi. Qolaversa, davlat-xususiy sheriklik asosida ijaraga berilgan yerda xususiy bog‘chani qurgan xususiy sherikka ushbu binoni mazkur loyiha uchun bank kreditlari bo‘yicha garovga qo‘yishga oid cheklovlar bekor qilinadi.
S.Murodova
