Inson yaratuvchi, dunyodagi jamiiyki ne’matlar u uchun. Eng oliy mavjudotning qilimishlari, u e’tibor bermaydigan jihatlar esa uni o‘rab turgan tabiatning, atrof-muhitning fojiasi bo‘lishiga esa u e’tibor bermaydi. Ekologiyani zararlasa ham, ozon qavatiga putur yetkazsa ham ana shunday davom etadi. Aslida tabiatni asrash ham, kelgusi avlodlarga boridek qoldirish ham insoniyatning muqaddas burchi emasmi?
Mashinamizdan chiqayotgan zaharli gaz, chiqindilarni yo‘q qilish uchun gugurt chaqib, zumda yoqib yuborgandagi tutun, biz tashlaydigan chiqindilar, zavodlarning zarari, ehhe, sanasangiz sanog’iga-da yetib bo‘lmas sabablar…
Bularning bari kamlik qilgandek, ana shunday zaharli gaz va tutunlarni yutib, bizga toza havo, kislorod berayotgan daraxtlarning bag’riga mix urib teshamiz-da, qandaydir e’lon va afishalarni ilib qo‘yamiz. Bu bilan mushkulimiz oson, muammoyimiz hal bo‘lsa bo‘lgani. Ammo, hech ham xayolimizga keltirmaymizki, tabiatga, tiriklikka zarar qilyapmiz.
Ko‘chalarni, jamoat joylarini kezib yurar ekanmiz, bunday manzaraga ko‘p bor duch kelish mumkin. Ijtimoiy tarmoqlarda, OAV orqali qanchalik bong urmaylik, daraxtlarga zarar keltirishda davom etishimiz ayanchli. Uzun tumani Ekologiya va atrof-muhitni muhofaza qilish bo‘limi davlat inspektorlari daraxtlarga urilgan mixlarni, har xil e’lon va afishalarni olib tashlashdi. Umid qilamizki, ushbu holatni ko‘rib, kuzatib o‘tguvchilar uchun bu yaxshigina saboq bo‘ladi va e’lon joylashning boshqa yo‘llarini qidirishadi.
Hilol
