Termiz shahridagi 16-sonli umumta’lim maktabiga harbiy libosidagi bir guruh mehmonlarning tashrif buyurgani o‘quvchilarni sergaklantirib qo‘ydi. Shaddod bolalar havaslanib boqdi. Bir-birlariga “men ham harbiy bo‘laman”, deya shivirlashga ham ulgurishdi.
Haqiqatan ham hayotini vatan xizmatiga baxshida etgan harbiylar faxrimiz, g‘ururimiz. Ular bor ekan tunlarimiz tinch, kunduzimiz charog‘on. Maktabda janubi-g‘arbiy maxsus harbiy okrug harbiylari va faxriy mehmonlar ishtirokida “Vatanni sheryurak bahodiri” mavzusida ma’naviy-ma’rifiy davra suhbati tashkil etildi.
O‘z navbatida aytish kerakki, harbiylikda o‘tkazilgan hayot yo‘li o‘quvchi-yoshlar uchun qiziq. Tadbir davomida mehmonlarining boshlaridan o‘tkazgan qiziqarli voqealar, sarguzashtlarni barcha maroq va hayajon bilan tingladi.
Harbiy bo‘laman degan orzuning o‘zi esa kamlik qiladi. Buning uchun o‘qish, yaratilgan shart-sharoitlardan oqilona foydalanish, mehnat va tinimsiz harakat qilish lozim. Mehmonlar yoshlarni ana shunday bo‘lishga chorladi. Harbiylik kasbiga havas uyg‘otib, orzularini yanada alanga olishiga sabab bo‘ldilar.
Zulfiya Soipova
