O‘zbekiston bayrog‘ini ko‘targancha viqor bilan yugurayotgan Durdona Tursunovaning ko‘zlarida yosh. Quvonch yoshlari. Sababi u Rossiya Federatsiyasining Vladivostok shahrida bo‘lib o‘tayotgan “Osiyo bolalari” xalqaro sport o‘yinlari musobaqasida tengdoshlari safida ishtirok etdi va birinchi o‘rinni egallab, oltin medal bilan ona yurtga qaytmoqda.
Taassurotlar esa cheksiz. Dunyoning turli burchaklaridan kelgan yosh sportchilar bilan tenglashish, maydonga tushish osonmas. Buning uchun tinimsiz harakat, o‘z ustida ishlangan mahorat kerak. Durdona o‘z mahoratini ko‘rsata oldi. Kurashga tushib, raqiblarini “halol” yengdi. O‘zbek qiziga, Barchinga xos kelbat va shijoat ila kurashdi. Yuzi yorug‘ bo‘lib, ustozlari va yaqinlari bildirgan ishonchni oqladi.
S.Murodova
