Yosh avlod ongu shuuriga ezgulik va nafosat tuyg‘ularini singdirib, estetik-ma’naviy kamolotga yetkazishda o‘zbek milliy raqs san’atining o‘rni va ahamiyati beqiyos. Milliy raqslarimizda xalqimizning o‘lmas qadriyatlari, insoniy fazilatlari, milliy an’analari aks etadi.
Raqs harakatlari oddiy harakatlar emas, unda sohir tuyg‘ular mujassam. Raqqosa buni his etishi, ohangda yashashi lozim. Ana shundagina raqqosa, ohang bilan bir butunlik kashf etadi. Qiziriq tumanidagi Barkamol avlod bolalar maktabiga qarashli 2-umumiy o‘rta ta’lim maktabida tashkil etilgan “Folklor musiqa” to‘garagida raqs san’ati ana shunday qarash bilan o‘rgatiladi. To‘garak rahbari Muhayyo Poyonova o‘quvchi-qizlarning har bir harakatini, o‘y-xayollarini san’at darajasida bo‘lishini uqtiradi. Raqsda yashash lozimligini aytishdan erinmaydi. Ta’til kunlarida vaqtini mazmunli o‘tkazayotgan qizlar milliy raqs san’ati sirlarini o‘zlashtirishayotir. Ularning raqslarini tomosha qilgan borki, estetik zavq oladi. Davrada xirom aylashlaridan hech bir professional raqqosalardan qolishmayotganiga ishonch hosil qiladi. Buning siri esa bitta — qunt bilan o‘rganish va malakali ustozning yondashuvi.
Sohibjamol Davlatova
