Bugungi kunda yosh avlodga e’tibor har doimgidan-da kuchli. Ularning munosib tarbiya topishi, bilim olishi, imtiyoz va imkoniyatlardan foydalanib, iqtidor va iste’dodlarini namoyish etishlari uchun barcha shart-sharoitlar yaratilgan. Birinchi navbatda bolajonlarning maktabgacha bo‘lgan davrida bog‘chaga borishlarini ta’minlash eng asosiy vazifa sanaladi. Bu yo‘lda amalga oshirilayotgan ishlar, viloyatning chekka-chekka hududlarigacha maktabgacha ta’lim tashkilotlarining qurilib, foydalanishga topshirilayotgani haqidagi xabarlar fikrlarimizni dalillaydi.
Demak, maktabgacha bo‘lgan yoshdagi bolalar vaqtini bekor o‘tkazmayapti. Foydali mashg‘ulotlar bilan mashg‘ul. Ko‘ngildagidek ta’lim va tarbiya olishayotir. Qiziriq tumanidagi “Gilambob” mahallasida ham yana bir maktabgacha ta’lim tashkilotining qurib foydalanishga topshirilgani quvonchi hodisa bo‘ldi. Ilk bor bog‘chaga qadam qo‘ygan o‘g‘il-qizlar yuz-ko‘zidagi xursandchilikdan ko‘rish mumkinki, ular ham ota-onalaridan kam quvonishmayapti.
Muassasada yaratilgan shart-sharoit va qulayliklar, tajribali mutaxassislarning jalb etilgani bolajonlarni munosib tarbiyalanishiga zamin hozirlaydi.
S.Normurodova
