Qo‘lida hunari bo‘la turib, bekor o‘tirishdan yomoni yo‘q. Ayniqsa, ana shunday hunarli ishsizlar soni ko‘p bo‘lsa, bu jamiyat fojiasiday gap. Ularni boshini bir qilib, bandligini ta’minlash maqsadida tashabbus ko‘rsatish esa katta savob. Tadbirkor Munavvar Hasanova ana shunday savobli ishga qo‘l urdi.
Tikuvchilikka ixtisoslashtirilgan “Parizoda innavatsyon” oilaviy korxonasi faoliyatini yo‘lga qo‘yib, ishsiz xotin-qizlarning 60 nafarini ishli qildi. Aynan “Ayollar daftari”da ro‘yxatda turuvchi xotin-qizlarni tanlagani ayni muddao bo‘ldi. Ushbu tikuv sexi orqali endi 60 oilaning kami but bo‘ladigan bo‘ldi.
Hali tikuv sexi to‘la kuch bilan ishga tushganicha yo‘q, shunday bo‘lsa, yana 100 nafar ishchi kuchiga ehtiyoj paydo bo‘ladi.
“Har bir oila tadbirkor” davlat dasturi asosida 850 million so‘m kredit olib, faoliyati boshlangan tikuv sexida qo‘li gul chevarlar xaridorlarning talab va istagidan kelib chiqqan holda sifatli va hamyonbop mahsulotlarni tayyorlashayotir.
S.Normurodova
