O‘quv yili bo‘yi ta’lim-tarbiya olish bilan band bo‘lgan yoshlarning munosib hordiq chiqarishlariga fursat yetdi. Yozgi ta’tilning ilk kunlaridan kimdir qishloqqa yaqin qarindoshlarining uyiga oshiqsa, kimdir oromgohga shoshadi. Ammo, yashash manzillarimizda, jonajon maktabimiz qoshida ham ko‘ngildagidek dam olish uchun shart-sharoit yaratilgan bo‘lsa, olis manzilga oshiqishga hojat qolmaydi.
Bir necha yilki, o‘g‘il-qizlarning dam olishlari uchun maktablarda tashkil etilgan yozgi “Sog‘lomlashtirish maydonchalari”ning faoliyati yaxshigina yo‘lga qo‘yilgan. Va o‘quvchi-yoshlar e’tiborini tortmay qolmayapti.
Denov tumanida ham yoz mavsumida boshlang‘ich sinf o‘quvchilarining vaqtlarini mazmunli o‘tkazish maqsadida barcha maktablarda ana shunday sog‘lomlashtirish maydonchalari tashkil etilgan.
Ko‘ngilli yoshlar bilan gavjum maktablarda soprt mashg‘ulotlari, yoshlarning qiziqish va layoqatlariga qarab to‘garaklar tashkil etilgan. Turli o‘yinlar va musobaqalar tarzida o‘tayotgan mashg‘ulotlar yoshlar vaqtini mazmunli o‘tkazibgina qolmay foydali ekani bilan ahamiyatli.
S.Davlatova
