O‘zini-o‘zi band qilish yaxshi natija beryapti. Bu orqali oilaviy daromad topish, ish o‘rni yaratish evaziga o‘zgalarning-da bandligiga erishilmoqda. Termiz shahridagi “Pattakesar” mahallasida istiqomad qiluvchi Anvar Qurbonovni mahalladoshlari asalarichi sifatida yaxshi taniydi. Asal kerak bo‘lsa, eshigini qoqadi.
Asalarichilikning sirini bilsangiz, asal arilar egasini xafa qilmaydi. Toza va hushtam mahsuloti bilan siylaydi. Ko‘rgan daromadingiz esa kam-ko‘stingizga yetib ortishi turgan gap. Anvar Qurbonov ham asalarichilikdan kam bo‘lgani yo‘q. Xonadonida qatorasiga joylashgan asal uyalarida ari oilalarini parvarishlayotir.
Mahalla va sektor rahbarlari maslahat solib, asalarichining eshigini qoqishdi. Maqsad — asalarichilik faoliyatini yanada kengaytirishi uchun amaliy yordam ko‘rsatib, mahalladoshlaridan 30 ta oilaga ushbu kasb sir-asrorlarini o‘rgatishi borasida kelishib olindi. Kelishuvga ko‘ra asalarichilikda o‘zini sinamoqchi bo‘lgan oilalarga joriy yilning 2-choragi mobaynida hokim yordamchisining tavsiyasi asosida kredit ajratiladigan bo‘ldi.
Ha, “Bir mahalla – bir mahsulot” tamoyili ijrosi doirasida mahalladagi tadbirkorlar ishsiz mahalladoshlariga o‘z yordam qo‘lini cho‘zishga tayyor. Mahalla drayveri (ixtisoslashuvi)dan kelib chiqib, hududda chorvachilik, tovuqchilik hamda issiqxona va xizmat ko‘rsatish nuqtalarini tashkil etish maqsad qilingan. Natijada 80 ta xonadonga kredit ajratilishi bo‘yicha hokim yordamchisi mas’uliyat va nazoratni o‘z zimmasiga olgan.
Hilol
