O‘zbek xalqi azaldan insonparvarligi, saxovatpeshaligi bilan o‘rnak va namuna. Ayniqsa, muhim kunlarda, bayram sanalarida ana shunday tuyg‘ular aks etgan ibratli ishlarni amalga oshirib, ko‘ngil uylarini obod etishni xush ko‘ramiz.
Mustaqilligimizning 31 yillik shodiyonalari oldidan Sherobod tumanida ehtiyojmand oilalarning 12 nafar farzandiga sunnat to‘yi o‘tkazib berilgani ham xalqimizning bag‘rikenglik, saxiylik kabi fazilatlarini va albatta, “Yangi O‘zbekistonda el aziz, inson aziz” degan ustuvor g‘oyani o‘zida mujassam eta oldi.
To‘y bolalar erta tongdan imom Abu Iso Muhammad at-Termiziy ziyoratgohida bo‘lishib, shundan so‘ng tumandagi “Baxtbek” to‘yxonasiga yo‘l olishdi. Ular katta tantanalar bilan kutib olindi.
To‘yda so‘zga chiqqan borki, to‘y bolalarni tabriklab, eng yaxshi tilaklarni bildirishdi. Mutasaddilar tomonidan bolajonlarga va ularning ota-onalariga sovg‘a-salomlar ulashildi. Bayramona bezatilgan dasturxon atrofida jam bo‘lganlar shodon kuy-qo‘shiqlarga raqsga tushib, mazmunli xordiq chiqardilar.
Sohibjamol
