Yurtimizda xotin-qizlarni har tomonlama qo‘llab-quvvatlash, ularning ijtimoiy holatini yaxshilash va munosib turmush sharoiti yaratish borasida keng ko‘lamli islohotlar amalga oshirilmoqda. Surxondaryo viloyatida ham og‘ir turmush sharoitida yashayotgan 141 nafar xotin-qizning uy-joy sharoitlarini yaxshilash, jumladan, 28 ta oila uchun yangi uy-joylar qurish, 113 ta oilaning mavjud turar joylarini ta’mirlash ishlari olib borilmoqda.
Shu munosabat bilan viloyat hokimi Ulug‘bek Qosimov Sherobod tumaniga tashrif buyurib, ushbu yo‘nalishda amalga oshirilayotgan ishlar bilan yaqindan tanishdi. Dastlab, tumanning “Buyuk Ipak yo‘li” mahallasida ishsiz xotin-qizlarni bandlikka jalb etish maqsadida tashkil etilgan “To‘yona xayir baraka” oilaviy korxonasi faoliyati ko‘zdan kechirildi. Bu yerda sarpo va ko‘rpa-to‘shaklar ishlab chiqariladi. Shunday loyihalarni kengaytirish va har bir mahallada joriy etish yuzasidan tegishli vazifalar belgilab olindi.
Shundan so‘ng, “Majnuntol” mahallasida og‘ir sharoitda yashovchi xotin-qizning ta’mirlanayotgan uyiga tashrif buyurildi. Oilaning mehnatga layoqatli farzandlarini hududdagi to‘qimachilik korxonasiga ishga joylashtirish, uy bekasi uchun savdo do‘koni ochish va boshqa zarur yordam ko‘rsatish bo‘yicha mutasaddilarga topshiriqlar berildi.
Shuningdek, Boysun tumanida ham manzilli ro‘yxatga kiritilgan, turar joyi ta’mirlanayotgan oila holati o‘rganilib, bu oilaga ham zarur amaliy yordam ko‘rsatish vazifasi yuklatildi.
