Termiz shahridagi 26-sonli umumta’lim maktabida alohida ta’lim ehtiyojlari bo‘lgan bolalar o‘rtasida «Men ham shu Vatanning bunyodkoriman» shiori ostida «Sen iste’dodlisan» tanlovining viloyat bosqichi o‘tkazildi.
Unda tuman va shahar bosqichlarida g‘oliblikni qo‘lga kiritgan 40 nafar o‘quvchi estrada-vokal, an’anaviy ijrochilik va tasviriy san’at yo‘nalishlarida o‘z iste’dod va mahoratini namoyish etdi.
Tanlov yakunlariga ko‘ra, estrada-vokal va an’anaviy ijrochilik yo‘nalishida Qiziriq tumani o‘quvchilari birinchi, Termiz shahri vakillari ikkinchi, Jarqo‘rg‘on tumani o‘quvchilari uchinchi o‘rinni egalladi.
Tasviriy san’at yo‘nalishida esa Sherobod tumani o‘quvchilari birinchi, Oltinsoy tumani vakillari ikkinchi, Qiziriq tumani o‘quvchilari uchinchi o‘ringa munosib ko‘rildi.
Bunday tanlovlar alohida ta’lim ehtiyojlari bo‘lgan bolalarning ijodiy salohiyatini yuzaga chiqarish, qobiliyatlarini qo‘llab-quvvatlash va o‘z imkoniyatlarini namoyon etishlariga keng yo‘l ochadi. Eng muhimi, har bir bola o‘z iste’dodi bilan jamiyat hayotida munosib o‘rin egallashi mumkinligini namoyon etadi.
