2027-yil 1-yanvardan boshlab tadbirkorlarga nisbatan «Birinchi xato uchun ogohlantirish» qoidasi joriy etiladi.
Yangi tartibga ko‘ra, birinchi marta qoida buzgan, biroq fuqarolarning hayoti va sog‘lig‘i hamda o‘zgalar mulkiga zarar yetkazmagan tadbirkorlarga darhol jarima qo‘llanmaydi. Ularga aniqlangan kamchiliklarni bartaraf etish uchun 10 kun muddat beriladi.
Shuningdek, tadbirkorlik subyektlarida bir yil davomida o‘tkaziladigan har qanday takroriy tekshiruv faqat Biznes-ombudsman ruxsati bilan amalga oshiriladi. Bunda kameral soliq tekshiruvlari mustasno etiladi.
Bundan tashqari, 2027-yil 1-yanvardan 2028-yil 31-dekabrgacha o‘rta va yirik tadbirkorlik subyektlari uchun huquqiy eksperiment o‘tkaziladi. Unga ko‘ra, tadbirkorlar auditorlik tashkilotini jalb etgan holda soliq va yig‘imlarni to‘g‘ri hisoblash hamda to‘lash bo‘yicha tashabbus tarzidagi auditdan o‘tishi mumkin.
Agar audit davomida aniqlangan xato va kamchiliklar 30 kun ichida bartaraf etilsa, tadbirkorga moliyaviy jarima qo‘llanmaydi.
Shuningdek, kichik biznes subyektlarini tekshirishga 3 yillik moratoriy e’lon qilindi.
