Mustaqillik — xalqimiz uchun eng ulug‘ ne’mat, tinch va farovon hayotimizning mustahkam poydevoridir. Bu qutlug‘ ayyom arafasida inson qadrini ulug‘lash, mehr va e’tiborni yuksaltirishga qaratilgan ezgu tashabbuslar yanada ko‘proq namoyon bo‘lmoqda.
Surxondaryo viloyati hokimi Ulug‘bek Qosimov Bandixon tumani Paxtakor mahallasida istiqomat qiluvchi ijtimoiy himoyaga muhtoj fuqaro Feruza Djumayeva xonadonida bo‘lib, bu yerda amalga oshirilgan bunyodkorlik va obodonlashtirish ishlari bilan tanishdi.
Tashrif davomida xonadon sohiblariga bayram sovg‘alari va ezgu tilaklar ulashildi. Ayniqsa, farzandlarning sovg‘alardan quvonib, bayram shukuhini his etgani tashrifga o‘zgacha fayz bag‘ishladi.
Bugun ushbu xonadonda yaratilgan sharoitlar — inson qadrini ulug‘lash va ijtimoiy himoyaga muhtoj oilalarni qo‘llab-quvvatlash borasidagi e’tiborning amaliy ifodasidir.
Mustaqillik bayrami arafasidagi bunday ezgu ishlar xonadonlarga quvonch, qalblarga mehr va ertangi kunga ishonch olib kirib, xalqimizning bayramona kayfiyatini yanada yuksaltirmoqda.
