Mustaqillik — xalqimizning tinch va farovon hayoti, yurtimizdagi bunyodkorlik va yangilanishlar uchun mustahkam zamin yaratgan eng ulug‘ ne’matdir. Qutlug‘ ayyomning 35 yilligi arafasida Surxondaryoda ana shunday ezgu o‘zgarishlar izchil davom etmoqda.
O‘zbekiston Respublikasi Prezidentining 2023-yil 16–17-noyabr kunlari Surxondaryo viloyatiga tashrifi davomida berilgan topshiriqlar ijrosi doirasida Bandixon tumani soliq inspeksiyasi uchun yangi bino barpo etilmoqda. Umumiy qiymati 4,4 milliard so‘m bo‘lgan zamonaviy bino soliq xodimlari uchun munosib mehnat sharoitlarini yaratish bilan birga, fuqarolarga ko‘rsatiladigan xizmatlar sifatini oshirishga ham xizmat qiladi.
Viloyat hokimi Ulug‘bek Qosimov qurilish jarayoni bilan tanishib, obyektni sifatli va belgilangan talablar asosida yakunlash, shuningdek, fuqarolar uchun qulay shart-sharoitlarni ta’minlash yuzasidan mas’ullarga tegishli topshiriqlar berdi.
Yurtimiz mustaqilligi shukuhi bilan uyg‘unlashgan bunday bunyodkorlik ishlari Bandixonning zamonaviy qiyofasini yanada boyitib, aholiga qulay va munosib xizmat ko‘rsatish uchun yangi imkoniyatlar yaratmoqda.
