Ijtimoiy himoya milliy agentligi hamda Oliy ta’lim, fan va innovatsiyalar vazirligi hamkorligida oliy ta’lim muassasalarining bakalavriat va magistratura bitiruvchilari o‘rtasida an’anaviy “Ijtimoiy taraqqiyot uchun” tadqiqot ishlari tanlovi o‘tkazildi.
Tanlovning asosiy maqsadi ijtimoiy himoya sohasida izlanish olib borayotgan yosh tadqiqotchilarni qo‘llab-quvvatlash, ularning ilmiy salohiyatini yuzaga chiqarish hamda ilg‘or tadqiqot natijalarini amaliyotga tatbiq etishga ko‘maklashishdan iborat.
Tantanali taqdirlash marosimida Ijtimoiy himoya milliy agentligi direktori Mansurbek Olloyorov, nufuzli ilmiy markazlar va oliy ta’lim muassasalari vakillari, shuningdek, xalqaro hamkorlar — Osiyo taraqqiyot banki (ADB) hamda Germaniya xalqaro hamkorlik jamiyati (GIZ) mutasaddilari ishtirok etdi.
Tanlov yakunlariga ko‘ra, magistrantlar o‘rtasida Mirzo Ulug‘bek nomidagi O‘zbekiston Milliy universiteti vakili Zilola Ochilova birinchi, Termiz davlat universiteti magistranti Marjona Salimova ikkinchi, Aniq va ijtimoiy fanlar universiteti vakili Xurshida Xodjayeva uchinchi o‘rinni egalladi.
Mazkur tanlov yoshlarning ijtimoiy himoya yo‘nalishidagi ilmiy izlanishlarini qo‘llab-quvvatlash, ularning amaliy ahamiyatga ega taklif va ishlanmalarini rag‘batlantirishda muhim maydon bo‘lib xizmat qilmoqda.
