Atrof-muhitni muhofaza qilish, ekologik xavflarni barvaqt aniqlash va barqaror rivojlanishni ta’minlash bugungi kunning eng dolzarb vazifalaridan biridir. Shu maqsadda O‘zbekistonda ekologik baholash tizimini xalqaro talablarga moslashtirishga qaratilgan yangi mexanizmlar bosqichma-bosqich joriy etilmoqda.
2026-yil 11-maydagi Vazirlar Mahkamasining 234-son qarori bilan davlat ekologik ekspertizasi va atrof-muhitga ta’sirni baholashning zamonaviy tartiblari tasdiqlandi. Yangi tizim ekologik ekspertiza jarayonlarini soddalashtirib, kichik biznes subyektlari uchun ortiqcha ma’muriy yuklamalarni kamaytiradi hamda barcha jarayonlarni Yagona interaktiv davlat xizmatlari portali orqali shaffof amalga oshirish imkonini yaratadi.
Shuningdek, Parij kelishuvi, Bazel, Biologik xilma-xillik va Orxus konvensiyalari talablari asosida xalqaro amaliyotlar joriy etilib, jamoatchilik ishtiroki, strategik ekologik baholash, loyiha tashkilotlari reytingi va mutaxassislarni malaka sertifikatlash tizimi yo‘lga qo‘yiladi.
Mazkur islohotlar ekologik talablarga javob bermaydigan loyihalarning oldini olish, atrof-muhitni ishonchli muhofaza qilish hamda kelajak avlod uchun sog‘lom va xavfsiz ekologik muhitni ta’minlashda muhim ahamiyat kasb etadi.
