Millatlararo totuvlik, o‘zaro hurmat va bag‘rikenglik jamiyat barqarorligi hamda taraqqiyotining muhim omillaridan biridir. Shu ezgu qadriyatlarni targ‘ib etish maqsadida Uzun tumanida 30-iyul — Xalqaro do‘stlik kuni munosabati bilan ma’naviy-ma’rifiy tadbir tashkil etildi.
“Yagona Vatan, yagona xalq bo‘lib, yangi hayot va kelajak yaratamiz” shiori ostida o‘tgan tadbirda 8-sonli umumiy o‘rta ta’lim maktabi o‘quvchilari turli millatlarning urf-odat va an’analarini aks ettiruvchi milliy raqslar, sahna ko‘rinishlari hamda badiiy chiqishlar bilan do‘stlik, ahillik va birdamlik g‘oyalarini tarannum etdilar.
Shuningdek, tuman Madaniyat bo‘limi san’atkorlari ijrosidagi kuy-qo‘shiqlar tadbirga o‘zgacha fayz bag‘ishlab, ishtirokchilar qalbida do‘stlik va hamjihatlik tuyg‘ularini yanada mustahkamladi.
