Angor tumanining “Yangiobod” mahallasida tashkil etilayotgan Kambag‘allikni qisqartirish markazida qurilish va obodonlashtirish ishlari faol davom etmoqda.
Hozirda markaz hududida belgilangan loyihalar bosqichma-bosqich amalga oshirilmoqda. Jumladan, tashrif buyuruvchilar va aholi uchun qulay sharoit yaratish maqsadida ichki yo‘llarni asfaltlash ishlari olib borilmoqda.
Mazkur bunyodkorlik ishlari markaz faoliyatini samarali yo‘lga qo‘yish, bandlikni oshirish hamda kambag‘allikni qisqartirishga qaratilgan tashabbuslarni amaliy natijaga aylantirishga xizmat qiladi.
Jarayon bilan tanishish maqsadida tuman hokimi Qosim Mardonov hududga tashrif buyurib, amalga oshirilayotgan ishlar holatini ko‘zdan kechirdi va ularning borishini nazorat qildi.
