AQSHning Texas shtati, Xyuston shahrida Oʻzbekiston xalq shoiri Abdulla Oripovning uy-muzeyi ochildi. Muzey shoir umrining soʻnggi yillarini oʻtkazgan xonadonda tashkil etilib, undan ijodkorning qoʻlyozmalari, shaxsiy buyumlari, kitoblari va hayot yoʻliga oid qimmatli eksponatlar oʻrin oldi.
Ochilish marosimida shoirning turmush oʻrtogʻi Xanifa aya, farzandlari, nabiralari, shuningdek, AQSHda istiqomat qilayotgan vatandoshlar, jurnalist va blogerlar ishtirok etdi.
Mazkur uy-muzey nafaqat atoqli adib xotirasini abadiylashtirish, balki oʻzbek adabiyoti va madaniyatini xalqaro miqyosda targʻib etish yoʻlidagi muhim qadam sifatida eʼtirof etilmoqda. Ayniqsa, Oʻzbekiston davlat madhiyasi muallifi bo‘lgan Abdulla Oripov merosining xorijda ham eʼzozlanayotgani milliy qadriyatlarimizning dunyo miqyosidagi nufuzini yanada mustahkamlashga xizmat qiladi.
Taʼkidlash joizki, uy-muzey tashkil etish tashabbusi ilk bor Prezident Shavkat Mirziyoyev tomonidan Qashqadaryodagi uchrashuvlardan birida ilgari surilgan bo‘lib, ushbu ezgu g‘oya bugun amaliy ifodasini topdi.
