O‘zbekiston Respublikasi Markaziy banki Sohibqiron Amir Temur tavalludining 690 yilligi munosabati bilan esdalik oltin va kumush tangalarni sotuvga chiqardi. Mazkur tangalar nafaqat to‘lov vositasi, balki tarixiy merosimizni aks ettiruvchi qimmatbaho kolleksion mahsulot sifatida ham ahamiyatga ega.
31,1 gramm og‘irlikdagi, 999,9 probali sof oltin va kumushdan zarb etilgan tangalar maxsus sertifikat bilan taqdim etiladi. Ularning old tomonida Amir Temur portreti, Toshkent va Samarqanddagi haykallari, shuningdek Oqsaroy va Amir Temur maqbarasi tasvirlangan.
Orqa qismida esa O‘zbekiston Davlat gerbi, 100 000 so‘m nominal qiymat va 2026 yil zarb etilgani aks etgan. Ayrim namunalarida “Temur tuzuklari”dan hikmatli so‘zlar ham joy olgan.
Bu tangalar buyuk ajdodimiz xotirasini ulug‘lash, milliy qadriyatlarni keng targ‘ib etish va numizmatika ixlosmandlari uchun noyob imkoniyat sifatida e’tirof etilmoqda.
