Angor tumanida aholi o‘rtasida sog‘lom turmush tarzini keng targ‘ib etish, jismoniy faollikni oshirish hamda ijtimoiy profilaktika tadbirlarini samarali tashkil etish maqsadida “Sog‘lom hayot uchun 5000 qadam” shiori ostida ommaviy piyoda yurish marafoni o‘tkazildi.
Mazkur tadbirda tuman tashkilot va muassasalari xodimlari faol ishtirok etib, sog‘lom turmush madaniyatini shakllantirish, kasalliklarning oldini olish va jamiyatda sog‘lom muhitni mustahkamlashga qaratilgan tashabbusni qo‘llab-quvvatladilar.
Shuningdek, markaziy o‘yingoh hududida ertalabki badantarbiya mashqlari va sport chiqishlari tashkil etilib, ishtirokchilarga sog‘lom hayot tarzining ahamiyati haqida tavsiyalar berildi.
Bunday tadbirlar aholining salomatligini mustahkamlash, jismoniy faolligini oshirish hamda sog‘lom va faol hayot tarzini qaror toptirishga xizmat qiladi.
