Surxondaryo viloyati hokimi Ulug‘bek Qosimov investorlar bilan navbatdagi uchrashuvlarni Xitoyning “Sino Sin Shanxi” kompaniyasi raisi Jao Juntao hamda “Qingdao Lenado Intelligent Equipment Co., Ltd” kompaniyasi injeneri Chjan Chjitsyan bilan o‘tkazdi. Unda mazkur kompaniyalar bilan hamkorlikda amalga oshirilayotgan loyihalarning amalga oshirish jarayonlari muhokama qilindi.
Jumladan, Boysun tumanida shaxta usulida ko‘mir qazib olish hamda uni chuqur qayta ishlab metanol, sintetik ammiak, karbamid, polipropilen, olefinlar va koks mahsulotlari ishlab chiqarish loyihasi qurilishi bilan bog‘liq masalalar ko‘rib chiqildi. Shuningdek, Termiz tumanida yo‘lga qo‘yilgan bazalt xom ashyosidan mineral vata ishlab chiqarish korxonasini jihozlash ishlarini yakuniga yetkazish jarayonlari muhokama etildi.
Yakunda mavjud loyihalarni amalga oshirish sur’atlarini jadallashtirish, ishlab chiqarish quvvatlarini ishga tushirish bo‘yicha kelishuvga erishildi. Shu bilan birga, istiqboldagi hamkorlikni yangi tashabbuslar va qo‘shma loyihalar orqali yanada kengaytirish imkoniyatlari qayd etildi.
