Kuz-qish mavsumiga tayyorgarlik nafaqat issiqlik ta’minoti yoki energiya masalasi, balki aholining kundalik ehtiyojlarini barqaror va arzon narxlarda ta’minlashni ham o‘z ichiga oladi. Shu maqsadda Termiz shahar hokimi Sharofiddin Lolayev boshchiligida shahar hududidagi yirik bozorlar va savdo majmualarida o‘rganish ishlari olib borildi.
Tashrif davomida aholining eng zarur mahsulotlari — un, yog‘, sabzavot, go‘sht va ko‘katlarning narxi, sifati hamda zahira holati sinchkovlik bilan tahlil qilindi. Shuningdek, mahsulot yetkazib beruvchilar bilan hamkorlik mexanizmlarini takomillashtirish, bozor rastalaridagi narx-navolarni barqaror ushlab turish, aholining talab-ehtiyojlarini to‘liq qondirish bo‘yicha mutasaddilarga aniq vazifalar belgilab berildi.
Hokim ta’kidlaganidek, kuz-qish mavsumida har bir mahalla, bozor va ijtimoiy soha obyektida barqaror ta’minotni yo‘lga qo‘yish, fuqarolarning tinch va farovon hayotini ta’minlash davlat siyosatining ustuvor yo‘nalishlaridan biridir. O‘rganishlar yakunida zarur oziq-ovqat mahsulotlarini yetarli miqdorda zaxiralash, ularni saqlash sharoitlarini yaxshilash, narxlarning keskin oshib ketishiga yo‘l qo‘ymaslik bo‘yicha qo‘shimcha chora-tadbirlar belgilandi.
