Chekka hududlardagi muammolarni joyida o‘rganish va tizimli hal etish davlat rahbariyati oldida turgan ustuvor vazifalardan biri hisoblanadi. Shu maqsadda Sariosiyo tumani hokimi Abduqodir Donayev hamda tuman Ichki ishlar bo‘limi boshlig‘i G‘. Xo‘jamqulov va Soliq inspeksiyasi rahbari Sh. Qosimov bilan birgalikda tuman markazidan 70 kilometr uzoqlikdagi tog‘li “Karsh” mahallasida bo‘lib, mahalliy aholi bilan ochiq muloqot o‘tkazdi.
Tashrif davomida homiylik asosida yangitdan qurilgan Karsh mahalla tibbiyot punktining ochilish marosimi bo‘lib o‘tdi. Tibbiyot muassasasi aholining birlamchi sog‘liqni saqlash xizmatlariga bo‘lgan ehtiyojini qondirishda muhim rol o‘ynaydi. Tuman rahbari va nuroniylar yangi binoda yaratilgan sharoitlar bilan tanishib, tibbiyot xodimlariga faoliyatlarida muvaffaqiyatlar tilashdi.
Shuningdek, “Karsh” va “Shabnam” mahallalari hamda Vochax qishlog‘i aholisi bilan bo‘lib o‘tgan uchrashuvlarda fuqarolar yo‘llar ta’miri, ichimlik suvi ta’minoti, ijtimoiy infratuzilmani yaxshilash kabi dolzarb masalalarni ko‘tarishdi. Har bir murojaat alohida qayd etilib, mas’ul mutasaddilarga aniq ijro muddati bilan vazifalar yuklatildi. Muammolarni hal qilish bo‘yicha qabul qilingan topshiriqlar hokimiyat nazoratiga olindi.
Ushbu tashrif chekka hududlar aholisi muammolari befarq qolmasligini, ular bilan bevosita muloqot orqali dolzarb masalalarga yechim topilayotganini yana bir bor tasdiqladi.
