Kitob – insonni yaxshilikka, ezgulikka va poklikka yetaklaydigan bebaho manbadir. U orqali inson o‘z o‘tmishi va bugunini anglaydi, kelajagini to‘g‘ri yo‘naltirish imkoniga ega bo‘ladi. Kitob mutolaasi kishini bilimli, tafakkuri teran, nutqi ravon va madaniyatli shaxs sifatida kamol topishiga xizmat qiladi.
Bugungi kunda yoshlar orasida kitobxonlikni targ‘ib etish, kitobga mehr uyg‘otish jamiyatning har bir a’zosi oldida turgan muhim vazifalardan biridir. Bu jarayonda oila, ta’lim muassasalari, jamoat tashkilotlari va ommaviy axborot vositalarining hamkorligi alohida ahamiyat kasb etadi.
Shu maqsadda yurtimizda kitobxonlikni qo‘llab-quvvatlash yo‘lida qator islohotlar amalga oshirilmoqda. Tanlov va festivallar, elektron kutubxonalar tashkil etilishi – barchasi bilimli va ma’rifatli avlodni tarbiyalashga xizmat qilmoqda.
Ana shunday ezgu sa’y-harakatlar samarasida, Surxondaryo viloyati Termiz shahrida “Yosh kitobxon” tanlovining 2024-yilgi shahar bosqichi g‘oliblari aniqlandi. 10–14 yosh toifasida Guliston mahallasidan Botir Zokirov, 15–19 yosh toifasida Muzrabot tumani Yangiyer mahallasidan Madina Menglimahmatova, 20–30 yosh toifasida esa Qumqo‘rg‘on tumani Hunarmandlar mahallasidan Maxbuba Jo‘rayeva faxrli o‘rinlarni egallashdi.
Mustaqilligimizning 34 yilligi munosabati bilan ularning ota-onalariga O‘zbekiston Mahallalari uyushmasi raisi Q.Quranboyev, Yoshlar ishlari agentligi direktori A.Sa’dullayev hamda Respublika ma’naviyat va ma’rifat markazi direktori O.Xasanov imzolagan tashakkurnomalar topshirildi.
Surxondaryo viloyati Yoshlar ishlari boshqarmasi g‘oliblarni samimiy tabriklab, kelgusida yanada yuksak marralarni egallashida omad tiladi.
D.Mahmudova
