Surxondaryo viloyatida aholining turar-joyga bo‘lgan ehtiyojini ta’minlash, tadbirkorlik uchun qulay sharoit yaratish va shaharsozlik qiyofasini yangilash maqsadida keng ko‘lamli qurilish ishlari olib borilmoqda. Termiz shahrida mazkur yo‘nalishdagi loyihalar amaliy o‘rganildi. Viloyat hokimi Ulug‘bek Qosimov dastlab “Zarbdor” tajribasi asosida drayver loyihalarni joriy etish jarayonlari hamda “Bolajon” bog‘ini suv bilan ta’minlash maqsadida amalga oshirilayotgan kanal rekonstruksiyasining yakuniy bosqichini ko‘zdan kechirdi. Shuningdek, yangi turar-joy majmualarining taqdimoti bilan ham tanishildi.
Tashrif davomida 2,6 gektar maydonda barpo etilayotgan “Temirchilik klasteri” va qurilish materiallari sanoat zonasi, “Movaro” turar-joy majmuasi hududidagi 24/7 turizm ko‘chasi hamda undagi savdo va xizmat ko‘rsatish maskanlari, “Kattabog‘” mahallasida qurilayotgan turar-joylar, mehmonxona va savdo kompleksi, shuningdek, turizm ko‘chasi qurilishlari o‘rganildi. Shuningdek, transport va harakat xavfsizligini ta’minlash, yangi avtoturargohlar tashkil etish hamda “Yangi Termiz siti” majmuasida amalga oshirilayotgan ishlarga oid mas’ullar hisobotlari tinglandi. Viloyat rahbari qurilishlarni jadallashtirish, loyihalarga takliflarni takomillashtirish hamda belgilangan vazifalarni o‘z vaqtida bajarish yuzasidan topshiriqlar berdi
