Mamlakatimizda aholi turmush farovonligini yaxshilash hamda bandligini ta’minlash, kambagʻallikni qisqartirish maqsadida bir qator chora-tadbirlar koʻrilmoqda.
Barchamizga ma’lumki, xorijiy mamlakatlarga moʻmay pul topish istagida ish izlab ketayotgan yurtdoshlarimizni koʻp uchratamiz. Ularning aksariyati noqonuny ravishda, ya’ni biror tanishi ijtimoiy tarmoqdagi katta mablagʻ vaʼda qilgan firibgarlarga ishonib, ish haqqini ololmaslik, ogʻir sharoitlarda ishlash, odam savdosiga duch kelish, hujjatsizlik kabi bir qancha muammolarga duch kelishadi.
Ana shunday holatlarning oldini olish maqsadida davlatimiz tomonidan zarur chora-tadbirlar koʻrilmoqda.
Xususan, Oʻzbekiston hukumati xorijda ishlayotgan fuqarolarning huquqlarini himoya qilish maqsadida rasmiy mehnat migratsiyasi takomillashtirmoqda (masalan, Rossiya, Janubiy Koreya bilan mehnat shartnomalari).
Xalqaro tashkilotlar (ILO, IOM) bilan hamkorlikda migrantlar huquqini himoya qilish kabi tashkilotlar faoliyat yuritayotir.
Bugungi kunda ishsiz yoshlarni kasbga oʻrgatish, tadbirkorlikka yoʻnaltirish va turmush farovonligini yaxshilash maqsadida mehnat yarmarkalari tashkil etilgan.
Denov tumani markazidagi “Eko bog‘” xiyobonida ham “Xorijda ish” mehnat yarmarkasi tashkil etildi.
Tadbirda Denov tumani hokimi Ilhom Abrorov va xorijga ishga borish istagi boʻlgan yoshlar ishtirok etdi.
Tadbir Migratsiya agentligi, O‘zbekiston Xususiy bandlik agentliklari uyushmasi, viloyati hokimligi hamda Denov tumani Kambag‘allikni qisqartirish va bandlikka ko‘maklashish bo‘limi hamkorligida tashkil etildi.
Yarmarkada eng ishonchli 15 ta xorijiy bandlik agentliklari va ish beruvchilar o‘z vakant ish o‘rinlarini taqdim etdilar.
Tadbir davomida ishtirokchilar Janubiy Koreya, Germaniya, Bolgariya, Mo‘g‘uliston, Slovakiya, Turkiya, Xorvatiya va boshqa davlatlarda qonuniy mehnat migratsiyasi tartiblari bilan tanishtirildi. Shuningdek, har bir mamlakatdagi ish haqi va mehnat sharoitlari, talab etiladigan hujjatlar va ularni tayyorlash jarayoni, xususiy bandlik agentliklarining servis va ko‘mak xizmati, mehnat shartnomalari va huquqiy kafolatlar haqida maʼlumotlar berildi.
Mazkur mehnat yarmarkasi aholi bandligini ta’minlash, xorijda ishlash istagi boʻlgan yoshlarning qonuniy va xavfsiz mehnat qilishida keng imkoniyat yaratadi, desak mubolagʻa boʻlmaydi.
D.Mahmudova
