Surxondaryo viloyatida iqlim va tuproq sharoitlaridan samarali foydalangan holda, ilgari yurtimizda yetishtirilmagan meva va sabzavot turlarini zamonaviy texnologiyalar asosida yetishtirish yo‘lga qo‘yilmoqda. Xususan, Sho‘rchi tumanidagi ilg‘or tomorqa egalari issiqxona sharoitida banan va sitrus mevalarni yetishtirishni yo‘lga qo‘yishmoqda.
Mazkur tajribani kengaytirish, aholini daromadli ish bilan ta’minlash hamda eksportbop mahsulot yetishtirish maqsadida Sho‘rchi tumani “Obodon” mahallasida 6 gektar maydonda kooperatsiya usulida banan yetishtirish loyihasiga start berildi.
Umumiy qiymati 8,3 milliard so‘m bo‘lgan loyiha doirasida 100 ta doimiy ish o‘rni yaratilib, yiliga uch marta hosil olish hisobiga 550 tonnagacha banan yetishtirilishi rejalashtirilgan.
Tadbirda Surxondaryo viloyati hokimi Ulug‘bek Qosimov ishtirok etib, daromadli ish o‘rinlari yaratish, import o‘rnini bosuvchi mahsulot yetishtirish hamda loyihani sifatli va samarali amalga oshirish yuzasidan mutasaddilarga tegishli ko‘rsatmalar berdi.
