Maktab issiqxonasi — daromad manbayi

Maktablarda juda yaxshi tashabbus yo‘lga qo‘yilgan. Yoshlar ta’lim-tarbiya sirlarini olish bilan birga foydali mehnat bilan band bo‘lishlari, ularning o‘zlarini ham xursand qilishmoqda. Termiz shahridagi 16-maktab tashabbusi bilan 2 sotixli yer maydonida barpo etilgan kichik issiqxona bugun nafaqat maktab ehtiyojlariga xizmat qilmoqda, balki bilim va amaliyotni uyg‘unlashtirishga ham ko‘maklashmoqda.
Issiqxonada texnik xodimlar mehnati bilan parvarishlanayotgan pomidorlar har kuni 5-10 kilogramgacha yig‘ib olinmoqda. Yangi uzilgan, tabiiy mahsulotlar asosan, maktab jamoasi uchun foydali oziq-ovqat sifatida, sotuvidan tushgan mablag‘lar esa ta’lim muassasasining ichki xarajatlarini qoplash uchun sarflanmoqda.
Bundan tashqari, issiqxona — o‘quvchilarga biologiya, kimyo va ekologiya kabi tabiiy fanlardan olgan nazariy bilimlarini amaliyotda mustahkamlash imkonini bermoqda. Maktab issiqxonasi nafaqat iqtisodiy foyda, balki ta’lim jarayonini yanada boyitish uchun samarali maydon bo‘lib xizmat qilyapti.