Iqtidorlar kashf etildi

Yurtimizda “Barkamol avlod bolalari” festivaliga start berilganidan xabaringiz bor. Qiziriq tumanida ushbu festivalning tuman bosqichi bo‘lib o‘tdi.
Festival bir necha yoʻnalishlarda o‘tkazilib, yoshlarga bir olam zavq bag‘ishladi. Tasviriy san’at yo‘nalishida iqtidorlar surat chizishda mahoratlarini namoyish etishgan bo‘lishsa, robototexnika va konstruktorlikda ham eng sara ixtirolar namoyish etildi. Shaxmatsevarlar uchun ham festival ayni muddao bo‘ldi. “Hunarmandchilik va qo‘l mehnati” yo‘nalishida esa ishtirokchilar munchoqlardan ajib san’at durdonaliga teng yaratiqlarni yasashdi.
“Turizm va ekologiya” yo‘nalishida esa meva va sabzavotlarda karving san’ati ustalari ustomonlik va mahorat ila ajoyib dekoratsiyalarni yaratishdi. Shuningdek, mental arifmetika va ingliz tili bo‘yicha bellashuvlar ham qiziqarli va muhim ahamiyat kasb etdi.
Yakunda gʻoliblarga diplom va esdalik sovgʻalari topshirildi.