Mehnati ortidan daromad

Tomorqa rizq-ro‘z, qo‘shimcha daromad manbaidir. Shu bois ham bir qarich yerdan ham unumli foydalanib, yil davomida bir necha marotaba ekin ekib hosil olish mumkin.
Ana shunday mehnatkash ayollardan biri Manzura Tursunovadir. Manzura opa Angor tumanining “Xomkon” mahallasida istiqomat qiladi. Oila a’zolari bilan birgalikda tomorqasining 9 sotixida issiqxona tashkil qilgan. Issiqxonada kabachka, ya’ni qovoqcha — qattiq po‘stli qovoqlar guruhiga mansub sabzavot ekini ekilgan.
— Uch oy avval kabachka urug‘ini ekkanmiz, — deydi Manzura Tursunova. — Hozirda issiqxonamizga ekilgan 3000 tup kabachka hosilga kirgan. Bir kilogramini 25-30 ming so‘mdan sotyapmiz. Mahsulotlarni xorijiy davlatlarga eksport qilish va ichki bozorlarga sotish uchun xaridorlarning o‘zlari kelib olib ketishadi. Mehnatimiz ortidan yaxshi daromad olyapmiz. Farzandlarimiz bilan el dasturxoni to‘kinligini ta’minlash maqsadida mehnat qilamiz.