Endi elektron tartibda…

Hujjatlar bilan ishlashda, ortiqcha qog‘ozbozlikka yo‘l qo‘ymaslik maqsadida davlat tashkilot va idoralarida ish yuritish electron shaklda olib borilayotir. Vazirlar Mahkamasinig 2024-yil 27-dekabrdagi 891-sonli qaroriga muvofiq, ish beruvchi va xodim o‘rtasidagi mehnat shartnomalari “Yagona milliy mehnat tizimi” idoralararo dasturiy-apparat kompleksi (“YMMT” IDAK) orqali elektron tartibda tuziladi. Qayd etilishicha, mehnat shartnomalari ish beruvchi tomonidan shakllantiriladi va taraflar o‘rtasidagi kelishuvga ko‘ra elektron raqamli imzo (ERI) yordamida imzolanadi.
Imzolangan elektron mehnat shartnomasini xodim o‘zining Yagona interaktiv davlat xizmatlari portalidagi (my.gov.uz) shaxsiy kabineti orqali yuklab olishi mumkin. Mehnat shartnomalarining elektron rasmiylashtirilishi natijasida ish beruvchilarga qulaylik yaratiladi, jarayon soddalashadi va norasmiy bandlik kamaytiriladi. Mehnat shartnomalarining qonuniyligini nazorat qilish imkoni mavjud bo‘ladi va xodimlarning mehnat huquqlari buzilishining oldi olinadi.