Abduvohid Jarqo‘rg‘on tumanidagi 10-sonli maktabning 7-sinfida tahsil oladi. Taqdir hukmi sabab u otasidan erta ayrilgan. Biroz muddat ilgari Abduvohid Jarqo‘rg‘on tuman Maktabgacha va maktab ta’limi bo‘limi boshlig‘i bilan bo‘lgan uchrashuvda o‘z velosipedi bo‘lishini orzu qilishini bildirgan edi.
Kuni kecha Abduvohidning ana shu orzusi ushaldi. “Kambag‘allikdan farovonlik sari” dasturi doirasida Maktabgacha va maktab ta’limi bo‘limi boshlig‘i Sirojiddin Adinayev Abduvohidga yap-yangi velosipedni topshirdi. Abduvohidning ukasi va singlisi ham ayni e’tibordan bebahra qolishmadi. Ularga ham issiq kiyimlar, o‘quv qurollari va boshqa sovg‘alar ulashildi.
— O‘rtoqlarimga dadalari yangi velosiped olib berishganda havas qilardim. Endi esa mening ham velosipedim bor. Juda ham xursandman. Rahmat barchangizga, — deydi quvonch ila Abduvohid.
