Yagona onlayn platforma ishga tushiriladi

Viloyatdan tashqariga chiqishimiz kerak bo‘lib qolganda samolyotda, poyezd yoki avtobusda ketish haqida tanlov qilamiz. Eng muhimi, yo‘lda o‘zimiz uchun qulaylikni o‘ylaymiz va cho‘ntagimizni ham hisobga olamiz. Ammo shunday paytda chipta olish uchun borib kelishimizga to‘g‘ri keladi. Ana shunday sarsongarchilikning oldini olish, uyda o‘tirgan holda chipta olish imkoniyati yaratiladi. Ya’ni barcha avia, temir yo‘l va avtobus qatnovlarida chipta olish imkonini beradigan yagona onlayn platforma ishga tushiriladi.
2024-yil 1-dekabrgacha xorijiy mamlakatlar kesimida xalqaro turizm ko‘rgazmalarida namoyish qilish uchun madaniy, gastronomik va hunarmandchilik kontenti ishlab chiqiladi. Qolaversa, yurtimizdagi barcha avia, temir yo‘l va avtobus qatnovlari haqida ma’lumot va chipta olish imkonini beradigan yagona onlayn platforma ishga tushiriladi.
Transport vazirligi avia, temir yo‘l va avtobus chiptalarini tabaqalashtirilgan narxlarda kamida 6 oy oldin savdoga chiqarish tizimini joriy qiladi. Shuningdek, Navro‘z umumxalq bayrami, Mustaqillik kuni, Yangi yil bayrami va Ramazon hayiti (Iyd al-Fitr) hamda Qurbon hayiti (Iyd al-Adha) diniy bayramlarini nishonlash davrida respublika hududlarini bog‘lovchi qo‘shimcha avia, temir yo‘l va avtobus qatnovlarini yo‘lga qo‘yadi. Amalga oshirilayotgan tadbirlar, jumladan, ochilayotgan yangi reyslar, reyslardagi yuklamalar, shakllantirilayotgan yangi avia va temir yo‘l marshrutlari to‘g‘risida ma’lumotlarni muntazam ravishda ommaviy axborot vositalari va ijtimoiy tarmoqlarda yoritib boriladi.