Mehmonlar munosib kutib olinmoqda

Boysun kengliklarida bahor nafasi ufurayotgan, gul-u lolalar yuz ochib, yashillikka burkangan bir paytda dunyo ahli bu go‘zallikni ko‘rish uchun yo‘lga otlangan. Manzil esa tobora yaqin…
Nihoyat, “Boysun bahori” xalqaro folklor festivalining bugun ilk kuni. Nufuzli festival boshlanishi oldi erta tongdan mehmonlarni tantanali kutib olish jarayoni allaqachon boshlanib ketgan. Mezbonlar Termiz xalqaro aeroportida tavoze’lik, rasm-rusumlarimizni joyiga qo‘yib, yorug‘ yuz ila mehmonnavozlik ko‘rsatishayotir.
O‘ziga xos tabiat manzaralari, issiq quyosh tafti bilan yuzlashgan mehmonlarning yuz-ko‘zida mamnuniyat ifodasi mujassam. Festivaldan katta taassurotlar olish, o‘zbeklarning milliy urf-odatlari, milliy taomlari, hunarmandchilik ko‘rgazmalari tomoshasidan bahramand bo‘lish ishtiyoqida yonishayotir.
Tantanali kutib olishdan so‘ng, Termiz davlat universitetida “Surxon vohasining insoniyat sivilizatsiyasidagi o‘rni: moddiy va nomoddiy madaniyat asoslari” mavzusidagi ilmiy-amaliy konferensiya boshlanadi.