Sport sohasida yoshlarimizdan ulkan muvaffaqiyatlar kutamiz. Xo‘sh, kutilganidek natijaga erishish uchun yoshlar sport bilan munosib shug‘ullanmoqdami, ularga yetarlicha shart-sharoit va qulayliklar yaratilganmi? Ayni jihatlarni ham hisobga olsak, nur ustiga nur bo‘lardi.
Hududlardagi haqiqiy holat bilan tanishish maqsadida Sport vaziri Adham Ikromovning shaxsan o‘zi xizmat safari bilan Surxоndaryo viloyatiga tashrif buyurdi. Xizmat safari davomida vazir Angor tumani hokimi Qosim Mardonov bilan birgalikda tumandagi sport maktabida bo‘ldi. U yerda sportchi yoshlar uchun yaratilgan sharoitlar bilan tanishdi.
Shuningdek, sport maktabi mutasaddilari va sportchilar bilan muloqot o‘tkazildi. Muloqot davomida vazir yoshlar bilan dildan suhbatlashdi. Qiziqishlari, ularga qaratilayotgan e’tibor haqida so‘radi. Ularga katta umid bog‘langanini aytib, bor kuch va mahoratlarini ishga slogan holda O‘zbekiston bayrog‘ini balandlarga ko‘tarishlari lozimligi haqida to‘xtaldi.
Samimiy ruhda kechgan uchrashuv yosh sportchilarga motivatsiya berib, yuqori natijalarni qayd etishsa, ajab emas.
Shahin Lodonov
