Rektor dars oʻtdi

Navbatdagi dars boshlansa-yu, auditoriyaga rektor kirib kelsa, talabalarning hang-u mang bo‘lib qolishi aniq. Termiz davlat universiteti tabiiy fanlar fakultetida xuddi shunday bo‘ldi. Darsni rektor A.Toshqulov o‘tdi. O‘tganda ham erkin va samimiy suhbat tarzida o‘tgan dars barchaga ko‘tarinki kayfiyat ulashdi.
Rasmiy formatdan yiroq boʻlgan uchrashuvda talabalarga Vatan rivojiga hissa qoʻshish, harakat va qatʼiylikka intilish, oʻz ustida izlanish, xorijiy OTM muassasalarida taʼlim olish, hayotni oʻzgartirishga undovchi eng sara asarlarni mutolaa qilish boʻyicha zarur tavsiyalar berildi.
— Oʻz bilimingiz, salohiyatingiz, tashabbuskorligingiz, innovatsion gʻoyalaringiz bilan mamlakat taraqqiyotiga hissa qoʻshishingiz uchun universitet sizni hamisha qoʻllab-quvvatlashga tayyor, — deydi TerDU rektori A.Toshqulov.
Rektor talabalarning fikrlash doirasi, orzu va maqsadlari bilan tanishdi. Ularning jamiyat, hayot toʻgʻrisidagi tushunchalari, yangi tashabbus va gʻoyalarini tingladi.