O‘zbekiston–Afg‘oniston–Pokiston orqali 1 million tonnadan ortiq yuk tashiladi

Termiz shahrida Belarus-Rossiya-Qozog‘iston-O‘zbekiston-Afg‘oniston-Pokiston multimodal transport koridorini rivojlantirish bo‘yicha ishchi guruhning birinchi yig‘ilishi bo‘lib o‘tdi. Unda davlatlarning transport vazirligi rahbarlari ishtirok etishdi.
Uchrashuvda mazkur multimodal transport koridorini rivojlantirish yo‘li bilan Markaziy Osiyo va MDHga aʼzo davlatlarni O‘zbekiston orqali Janubiy Osiyo mamlakatlari bilan bog‘lash va O‘zbekistonning tranzit salohiyatini yanada oshirish masalalari muhokama etildi.
Yakunda tomonlar o‘rtasida yo‘l xaritasi imzolandi. Mazkur yo‘l xaritasida yuk tashuvlarini rivojlantirish bo‘yicha aniq rejalarni amalga oshirish belgilangan. Xususan, yuk tahlillarini olib borish, tashuv jarayonida elektron raqamli hujjatlardan foydalanish, tashuv jarayonlarini soddalashtirish bilan O‘zbekiston-Afg‘oniston-Pokiston orqali tranzit yuk tashuvlarini oshirish ko‘zda tutilgan bo‘lib, 2024-yilda mazkur koridor orqali O‘zbekiston 1 million tonnadan ortiq yuk tashishni rejalashtirgan.