Surxondaryolik yosh innovatorlar “aqlli hassa” yaratishdi

Ba’zi ixtirolarni ko‘rib, kuzatib turib, tinib-tinchimagan odamlar nimalarga qodir-a deymiz beixtiyor. Albatta, bunday ixtirolar insoniyat og‘rini yengil, mushkulini oson qilishga, qulayliklar yaratishga ximat qilishi bilan ahamiyatli. Surxondaryolik aka-uka Mashhurbek va Abdumalik Qarshiyevlar hamda ularning singlisi Muharram oddiy hassani innovatsion “aqlli hassa”ga aylantiradigan noyob qurilma yaratdilar.
Aytish kerakki, “Aqlli hassa” texnologiyasi ko‘rish bo‘yicha nogironligi bo‘lgan odamlarning mustaqil harakat qilish imkoniyatini oshirishga, ularning jamiyatda faol bo‘lishlariga qaratilgan. U ovozli yordamchi, akselerometr va kompas hamda doimiy yangilanib turadigan funksiyalarni o‘z ichiga oladi.
UNICEF tomonidan UPShIFT dasturi asosida amalga oshirilayotgan ushbu dastur O‘zbekiston yoshlari uchun tadbirkorlikda yangi yechimlarni taklif qiladi. Shuningdek, bu orqali jamiyatdagi muammolarni aniqlab, ularning yechimini topish uchun ajoyib imkoniyat hamdir. Termizlik iqtidorli yoshlar ham ushbu dastur doirasida o‘z jamoalarini tuzib, yangi innovatsiyalar ustida bosh qotirishmoqda. Ha aytgancha, dastur Surxondaryo viloyati hokimligi, Yevropa Ittifoqi va “Istiqbol avlod” respublika ijtimoiy-axborot markazi tomonidan qo‘llab-quvvatlanadi.