Milliy liboslarni faqat to‘y-u hashamlarda, bayram-u sayllarda kiyishga odatlanganmiz. Aynan shunday sanalarda milliylikka qaytamiz. Angor tumanida “Hunarmandlar” uyushmasi hamda tuman hokimligi hamkorligida o‘tkazilgan milliy liboslar ko‘rgazmasida ipak mahsulotlaridan tayyorlangan milliy liboslar namoyishi milliy liboslarimizga har doim murojaat qilishning eng yaxshi targ‘iboti bo‘ldi.
Qolaversa, ushbu ko‘rgazma O‘zbekiston Respublikasi Prezidentining “Aholini hunarmandchilikka jalb qilish va hunarmandchilik faoliyatini rivojlantirish uchun qulay shart-sharoitlar yaratish chora-tadbirlari to‘g‘risida”gi farmonining ijrosi bo‘ldi. Bu bilan yoshlar ipak mahsulotlarini tayyorlash, tikish-bichish kasbiga qiziqish uyg‘otish va bu bilan o‘z yo‘llarini tanlash maqsad qilindi.
Tadbir davomida kamalakrang xonatlas, ko‘rkam adras, nafis shoyi kabi milliy matolarimizdan tikilgan betakror go‘zal liboslar tomoshabinlar diqqat e’tiborini tortdi.
