Qo‘chqor Norqobil “Yil yozuvchisi” bo‘ldi

Qo‘chqor Norqobil serqirra ijodkor. Adib asarlaridagi qahramonlar hayotdan olingani uchun ham ko‘ngilga yaqin, e’tibor-u e’tirofga sazovor. Dramaturg qalamiga mansub “Toglardek baland bo‘l!”, “Zamindan olis ketma”, “Taqdir sinovlari”, “Dildagi dog‘”, “Ayyorgina ayollar” deb ataluvchi pyesalari allaqachon teatr sahnasida o‘z muxlislarini topib ulgurgan.
Hozirgi kun dramaturgiyasida Qo‘chqor Norqobil kabi ayollar haqida asarni mo‘l-ko‘l yozgan ijodkor kam, asosiy bosh qahramoni ayol bo‘lgan pyesalar ham. Rus adabiyoti Chexovni “ayollar bilimdoni” deb nomlagan bo‘lsa, biz Qo‘chqor Norqobilni o‘zbekning Chexovi desak adashmagan bo‘lamiz. U zamonaviy adabiyotda nafaqat dramaturgiyasi bilan, balki teran poeziya va poetikasi bilan o‘z dastxatini qoldirayotgan serqirra ijodkordir.
Tinib-tinchimas adib Qo‘chqor Norqobil o‘tgan yilda Rossiyaning qator nashrlari, jumladan, “Российский колокол” jurnalida eʼlon qilingan hikoyalari uchun mazkur nashr va “Литературной газеты” tavsiyasiga binoan “Yil yozuvchisi” adabiy tanlovida g‘oliblar safidan joy oldi.