Har qanday tadbirkorlik faoliyatini boshlash, kengaytirish uchun masalasi moliyaviy tomonga borib taqaladi. Mablag‘ bilan g‘oya va loyihalar amalga oshiriladi, hududda ishbilarmonlik muhiti shakllanadi, ishlab chiqarish va xizmat turlari taklif etiladi. Ana shunday paytda fuqaro yoki tadbirkor tijorat banklariga murojaat qiladi. Har doim ham rejalarimiz biz kutgandek bo‘lavermaydi. Biznes esa tezkorlikni, uddaburonlikni talab etadi. Tadbirkor uchun vaqt — bu pul degani.
Tadbirkorlarni qo‘llab-quvvatlash, kerakli ta’minotni ajratilishida amaliy yordam berish maqsadida Surxondaryo viloyati hokimi Ulug‘bek Qosimov Kichik biznesga ko‘maklashish markazida Markaziy bank va tijorat banklari hamda mutasaddilar bilan Termiz shahrida yangi tadbirkorlik loyihalarini amalga oshirish masalasini muhokama qildi. Istiqbolli loyihalarni amalga oshirish orqali yangi, daromadli ish o‘rinlari yaratish bo‘yicha vazifalar belgilab berildi.
Shundan so‘ng, viloyat rahbari “Vatanparvarlar” bog‘ida tashkil etilgan kutubxona faoliyati bilan tanishdi hamda shu yerning o‘zida mahalla “yettiligi”ning amalga oshirgan ishlari va kelgusidagi rejalari yuzasidan axborotini tingladi. Shuningdek, shahar hududi bo‘ylab obodonlashtirish va ko‘kalamzorlashtirish ishlari hamda daraxt va gul ko‘chatlari ekish tadbirlari bilan ham tanishildi.
