Shiddat va shijoat bahsi

Azaldan xalqimizda to‘y-u hashamlarda, bayram va sayillarda kurash, ko‘pkari, arqon tortish, xo‘roz urishtirish o‘yinlari uyushtirilib, ota-bobolarimiz vaqtlarini chog‘ o‘tkazishgan. Alp o‘g‘lonlar ana shu tariqa bilagidagi kuchni sinovdan o‘tkazib, yuragidagi olovni so‘ndirishgan-da.
Ko‘pkari esa ko‘pning ishi. Ko‘pkarida ot surish ham, uning tomoshasi-da qiziqarli mashg‘ulot. Ko‘pkari oddiy o‘yin emas, u erni er qiladi, chobag‘onni epchil, dovyurak qiladi. Muhimi sovringa qo‘yilgani emas, muhimi chavandozning xalq oldida yuzi yorug‘ bo‘lishidir. Uzun tumanida ham milliy qadriyatlarimizdan biri, Navro‘z umumxalq bayrami munosabati bilan tuman hokimi Xabibulla Bozorov taklifiga binoan “Ko‘pkari” musobaqasi o‘tkazildi.
Musobaqa davomida chavandozlarning qiyqirig‘i-yu, ishqibozlarning olqishi, chang-to‘zonga to‘lgan uloq maydoni o‘zgacha atmosfera kasb etdi. Shiddat va shijoatda kechgan bahslarda olomon olqishi “Ko‘pkari” nechog‘lik zavqli sport turi ekanligini aks ettirib turdi.