Sahna ortida…

Darvoqe, bayramni bayramdek o‘tkazib, xalq kayfiyatini ko‘tarishga xizmat qilayotgan, ishi ko‘rinib, o‘zi ko‘rinmaydigan, sahna ortida qolib ketadigan soha mehnatkashlari ham bor.
O‘n yildan oshiq davr mobaynida Termiz shahridagi Madaniyat uyida ovoz operatori sifatida faoliyat olib borayotgan Yodgor To‘rayev ham ana shunday kadr ortida ishlaydigan mehnatkashlardan. Butun bir bayram va sayilni risoladagidek o‘tkazish uchun musiqa va ovoz bilan ta’minlab berayotgan mutaxassisning ishiga mehri bo‘lakcha.
— Ishimiz qiziqarli, — deydi Y.To‘rayev. — Shu bilan birga mas’uliyat, sergaklik talab etadi. Xato qilishga, adashishga haqimiz yo‘q. To‘g‘ri, endi ishimni boshlagan kezlarimda, ana shunday xato va kamchiliklarga yo‘l qo‘ygan kezlarim bo‘lgan. Buning uchun sahnalashtiruvchi rejissorlardan, rahbariyatdan dakki ham eshitganman. Bora-bora ishingizda pishib, tajribangiz ortib borarkan.