Yangi maktabgacha ta’lim tashkiloti foydalanishga topshirildi

Maktabgacha bo‘lgan bolajonlarni bog‘chaga qamrovini oshirish masalasida olib borilayotgan ishlar tahsinga sazovor, albatta. Kechagina bog‘cha ko‘rmay maktabga borgan yoshlar osmondan tushgandek, harf tanishi, hisob-kitobni o‘rganishiga to‘g‘ri kelgan bo‘lsa, bugun bog‘chaga borib, so‘ng maktabga borayotgan o‘g‘il-qizlar harf tanigan, matematik amallarni bilgan, zukko va tirishqoqlik ila bilimlarini boyitishda davom ettirayotgani bilan ajralib turadi.
Angor tumanining “Yangi hayot” mahallasida 18-sonli davlat maktabgacha ta’lim tashkiloti foydalanishga topshirilishi ham ana shunday zukko va bilimli bolajonlarni ta’lim-tarbiya qilishdagi qadamlarning davomi bo‘ldi. Zamonaviy uslubda qurilgan ushbu maktabgacha ta’lim tashkiloti 90 o‘ringa mo‘ljallangan bo‘lib, loyiha qiymati 3 milliard so‘mni tashkil etadi.
Tantanali ochilish marosimida tuman hokimi, mahalla nuroniylari va faollari ishtirok etishdi. Tuman hokimi barchani yangi maktabgacha ta’lim tashkiloti ishga tushgani munosabati bilan qutlar ekan, tarbiyaning negizi bo‘lgan maktabgacha ta’lim tashkilotlarini zamon talablari darajasida yuqori saviyada tashkil etish, zarur anjomlar, malakali kadrlar bilan ta’minlash yetuk, barkamol kelajak avlodni tarbiyalashda muhim omil ekanligini ta’kidlab o‘tdi.